Daar was altesaam 120 versoeke om mondelinge kommentaar uit die meer as 700 000 skriftelike kommentare wat ingedien is oor die voorstel dat artikel 25 van die Grondwet gewysig moet word om onteiening sonder vergoeding moontlik te maak.
Altesaam 42 mondelinge kommentare is reeds gelewer. Nóg 19 kommentare het aangedui dat die betrokke mense of instellings steeds ’n spreekbeurt wil hê.
Een van die organisasies is die PAC, ’n politieke party wat verteenwoordiging in die Parlement het. Hierdie versoek is afgekeur.
Mnr. Lewis Nzimande, medevoorsitter van die komitee, sê die komitee beoog om teen 15 November sy finale verslag te aanvaar. Die verslag sal ’n aanbeveling bevat oor watter rigting die Parlement met die kwessie moet inslaan. Dit sal hopelik op 16 November verskyn in die dokument van die nasionale wetgewer waarin aankondigings, verslae wat ter tafel gelê moet word, en komiteeverslae vervat word.
’n Debat oor die verslag sal na verwagting op 27 of 28 November geskied, waartydens die Nasionale Vergadering sal moet besluit of hy die verslag aanvaar of afkeur.
Die voorlopige verslag oor die openbare verhore wat in die provinsies gehou is, dui reeds aan dat ’n grondwetlike wysiging oorweldigende steun geniet.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.